سؤال!!

جدع يا باشا دي جت في عينه!!

أو أيا كانت الجملة اللي اتقالت,,

رسالتي موجهة لل "باشا"

اللي فقع عينه

يا ترى كان ايه شعورك؟؟؟

كان ايه احساسك وانت "بتفقع عينه"

مبسوط, فرحان, فخور بقدرتك على النشان؟؟

يا ترى ايه أثر المدح ده في نفسك؟؟

هل حسيت بقيمة نفسك

مبسوط يا باشا؟؟

انا مش هتكلم في نقطة انت عندك دم ولا إحساس أصلا ولا لأ

بس عندي ليك سؤال تاني معلش

استحملني انت عارف المشاهير بيبقى عامة الشعب الغلابة اللي زي حالاتي عندهم ليهم أسئلة كتير

ايه شعورك وانت صورتك متشيرة على الفايس كله؟؟

واسمك ورقم تليفونك وعنوانك

حتى لو كانوا فاكسين ومش صح

او صح مين عارف

ايه إحساسك وشعورك بقى وكل واحد مصري حتى لو منزلش الثورة ولا ليه في السياسة نفسه يقتلك أو على الأقل يفقع عيونك 

يا ترى فخور

ولا خايف جبان

يا ترى إحساسك بنشوة إتقانك للنيشان لسة ماليك؟؟

ايه احساسك وانت بيتقال اسمك في التليفزيون وصورتك

ويتذاع الفيديو وانت قادر اوي على النيشان

طب بلاش

معلش استحملي

قولنا الشهرة بقى 

يا ترى عندك ولاد؟؟ 

ايه إحساسهم لو شافوا صورتك وعرفوا 

اكيد كانوا فخورين بيك

كأي ولاد فخورين بوالدهم

لا وخصوصا قناص وبينشن بقى وحركات

كنت بتمثل ليهم قدوة وأمن وحماية

لما يعرفوا انك "فقاع عيون" 

هيعملوا ايه

وصورتك في عيونهم هتبقى ايه؟؟؟؟

طب لو معندكش ولاد

يا ترى أهلك,, "أمك" إحساسها ايه

تعبها في تربيتك

حسرتها عليك عاملة ازاي

مبسوط يا باشا؟؟

جدع يا باشا بقيت من اكتر الصور اللي اتشيرت 

واكتر الاسامي اللي تداولت

يا ريتك بس تبقى عبرة

إنك لو انت فقعت عين علشان تغفل عنك

فعيون كتير اهي ماسكة تقطيع في فروتك وإن طالت مكانتش سابتك حيّ

وقبلهم,, عين الله لا تنام عنك

ومتقلقش مهياش دي أخر شهرة ليك يا باشا

اصل لسة في يوم جاي,, يوم حسابه عسير قوي

اه أنا واثقة في رحمة ربنا

بس ثقتي في عدله سبحانه ملوش زي

ممكن تكون اه فقعت عيون هنا

في الدرى وسط حراسة 

بس هناك لا فيه درى ولا فيه حراسة

ولا فيه حد يشفع ولا حد يتحمل مسئوليتك

ولا حد يشيل اللوم بدالك

جدع يا باشا حسابك جاي تقيل,, تقيل اوي!!

فجركم,, بشائره فرج.. =)

صبااااااااااااااااح الخير ^_^ 

مش عارفة هل دي تهيؤات ولا أوهام :D

بس أنا مبسوطة الحمد لله,, نوعا ما مرتاحة,, مش قلقانة,,

حاسة ببشائر فرج جاية في الطريق محدش يقولي ايه معالمها علشان أنا معنديش أي فكرة

بس فعلا حاسة بنسائم حرية,, يمكن في وحدة الناس اللي ابتدت تتفق رغم اختلافاتها

يمكن في تجمع همنا لهم واحد

معرفش

بس حقيقي,, أنا مستبشرة خير,, ومتفائلة بفضل الله

ربنا يخرجنا كلنا من المحنة دي على خير,, وينجي مصر وأهلها يا رب من كل شر

ولا يحكمش علينا ظالم أبدا =)

ومن نبع هذا الإحساس,, أدعوكم للتفاؤل,, ويومكم بيضحك ^^

وجع قلب..!

قلبي واجعني.. 

انبارح وأنا بعدي الشارع شفت قطة صغيرة,, يا عيني داستها عربية

وجثتها في الشارع والدم خارج منها,, منظرها كان يقطع القلب,, لدرجة اني فعلا كنت حاسة اني هقع من طولي ومش هقدر اكمل طريقي

لما وصلت لأمي قالت لي مالك انتِ كنتِ كويسة,, قلت لها على منظرها وبكيت,, يمكن اه دي رقة قلب زايدة,, بس مش دي المشكلة

المشكلة في اللي انعدمت قلوبهم خالص,, اللي طاوعته ايده ومش بس ضرب أخوه أو أخد حقه,, لا ده قتله!!

بقول لصاحبتي انبارح ازاي ييجي لهم قلب,, قالت لي هما عندهم قلب....!!!!

طب بجد,, ازاي,, ما هم في الأول والآخر مننا,, من أهلنا,, ممكن يكونوا من جيرانا أصحابنا عزوتنا

إزاي بقى يضربوا في أهلهم كدة بدون قلب, بدون إحساس, إزاي طاوعته إيده 

وعلى رأي توأم روحي,, قلب الوطن كله موجوع =(

ربنا يرزقنا قلوب سليمة,, ويعيذنا من خذلانهم ده..!

رحلت,, وما ارتحلت..!

ما زلت تحتلني,,

تسكن جوانبي

ما زلت مُتفردا ببطولة  أحلامي

وما زلت لا يمكنني التخلص من ذاكرتي

كانت تغيب عني أنفاسي إن غبت

تُخاصمني روحي إن غابت عينيك

أراك في أدق تفاصيلي رغم أنك لعهدك خنت

وارتحلت

ارتحلت وما تبقى شيء سوى الصمت

أبحث اليوم عنك

علني أجدك

اُدقق في ملامحي كثيرا

علك أتيت

ولا أجدك

بُعدي لم يكن بمحض إرادتي

وما صدقت

ما كان مني سوى أني للأمر انصعت

وبعدها ما حييت

فما الحياة إلا حياة القلوب

وأنا لم يعد قلبي حيٌّ بعد

أتساءل كيف انسللت مني؟!

كيف ابتعدت وفي طريقك مضيت؟!

لم تكن يوما جزءًا مني

بل,, كنت تجري مجرى الدم في عروقي

وهربت كما يهرب الدم من شاهـٍ قُطع عنقها وفرت روحها

ما سألت عني

ولا اطمأننت لحالي

أما مررت ببالك قط؟!

لا أزال أكتب عنك

أكتب عنك كثيرًا

عل حروفي تُحييك

تدب الروح في رفاتك

وما استجبت

ما أن انتهي من كتابتك

وصفك

رسمك

أضم أوراقي إلى صدري طويلًا

فقط,, لأنها عنك

أضمها علها تأتيني بك

أو تأخذني إليك

ولكني دوما أُردُ خائبة الرجا

وقد انقطع بي كل سبيل إليك.. =(

الفراق..

الفراق,, عذاب أم راحة؟؟

ثمة فراق في حقيقته رحمة,,, وإن كان في ظاهره قسوة

وثمة فراق لا تنفك عنه القسوة

وثمة فراق يزيد الاشتياق وآخر يقتل كل مشاعر الحب والوفاء

وثمة فراق هو عذاب وآخر هو محض رحمة

قد يكون الفراق عن محض إرادة أو قمع مطلع

لكنه يبقى في النهاية فراق,, ولا ينفك عنه الألم والعذاب..

لا فرقكم الله عن أحبابكم وأدام عليكم وصالهم..

جبر الخاطر,,

عبادة منسية,, أو متناساة فيما بيننا,,, رغم يُسرها ورغم أنها أسرع وأسهل طريقة لرسم ابتسامة صادقة من القلب نابعة,,

يتهاون بها الكثيرون ويُقلل من شأنها آخرون,,

هي ليست مُكلفة ولا مُرهقة,, مجرد كلمة أو كلمات,, تنتج عن إحساس صادق 

إحساس بالامتنان,, بالحُب,, بالعُرفان,, 

هي تعني الكثير,, ويُقدرها من يتلقاها ويحرص عليها فيما بعد,,

فلنُعد إحيائها وتداولها فيما بيننها,,فلنقدمها اليوم,,حتى نجدها عند احتياجنا لها في الغد,,

محو أُمية سياسية,,

عن جد عن جد,, أنا مش فاهمة اي حاجة في أي حاجة :D

انتخابات ومجلس ونواب ومعرفش ايه

طب يا عالم أنا واحدة من الناس اللي لا ليها في سياسة ولا بتيخ,, 

بغض النظر عن اني شايفة اني لازم اه اروح وانتخب وان مينفعش نسكت ونسيب الدنيا ماشية جهجاهوني كدة

بس انتخب على أساس ايه؟؟؟ الخيارات اللي قدامي,, طب اللي هنتخبه ده هيمثلني في ايه

هيكون دوره ايه يعني

طب فرضا روحت علشان انتخب,, اعرف منين ده حد كويس ولا سلطة زي ما طول عمرها عايشين,,

حقيقي مبقتش عارفة ولافاهمة

واقفة في النص ولا عارفة المفروض اروح يمين ولا شمال

حاسة اننا محتاجين محو أُمية سياسية,,

نبتدي نعرف ونفهم مين بيعمل ايه ومين مسئول عن ايه

ربنا يعدي الدنيا على خير بقى,, والحال يتصلح ويزيد الوعي شوية,,

واللي ييجوا من بعدها واحنا قبلهم نكون فاهمين الدنيا ماشية ازاي

مش اهي ماشية وخلاص -_-

يلا دعواتكم بقى,, واوعوا متنتخبوش :D